The Northern Way

The Complete Corpus of Anglo-Saxon Poetry

Riddle 22
Verse Indeterminate Saxon


ætsomne cwom      LX monna
to wægstæþe      wicgum ridan;
hæfdon XI      eoredmæcgas
fridhengestas,      IIII sceamas.

5

Ne meahton magorincas      ofer mere feolan,
swa hi fundedon,      ac wæs flod to deop,
atol yþa geþræc,      ofras hea,
streamas stronge.      Ongunnon stigan þa
on wægn weras      ond hyra wicg somod

10

hlodan under hrunge;      þa þa hors oðbær
eh ond eorlas,      æscum dealle,
ofer wætres byht      wægn to lande,
swa hine oxa ne teah      ne esna mægen
ne fæthengest,      ne on flode swom,

15

ne be grunde wod      gestum under,
ne lagu drefde,      ne on lyfte fleag,
ne under bæc cyrde;      brohte hwæþre
beornas ofer burnan      ond hyra bloncan mid
from stæðe heaum,      þæt hy stopan up

20

on oþerne,      ellenrofe,
weras of wæge,      ond hyra wicg gesund.

 

Index  |  Previous page  |  Next page