Northvegr - Easy Readings In Old Icelandic

Our Fathers' Godsaga : Retold for the Young.

Home | Site Index | Heithinn Idea Contest |

Easy Readings In Old Icelandic

Chapter 47

The Settlement Of Thorsness

Þórólfr, son Örnolfs fiskreka, bjó í Mostr; því var hann kallaðr Mostrarskegg; hann var blótmaðr mikill, ok trúði á Þór; hann fór fyrir ofríki Haralds konungs hárfagra til Íslands, ok sigldi fyrir sunnan land; en er hann kom vestr fyrir Breiðafjörð, þá skaut hann fyrir borð öndvegissúlum sínum; þar var skorinn á Þórr; hann mælti svá fyrir, at Þórr skyldi þar á land koma sem hann vildi at Þórólfr bygði; hét hann því, at helga Þór alt landnám sitt, ok kenna við hann. Þórólfr sigldi inn í fjörðinn, ok gaf nafn firðinum, ok kallaði Breiðafjörð; hann tók land fyrir sunnan fjörðinn, nær miðjum firðinum; þar fann hann Þór rekinn í nesi einu; þat heitir nú Þórsnes. Þeir lendu þar inn frá í váginn, er Þórólfr kallaði Hofsvág; þar reisti hann bœ sinn, ok gerði hann hof mikit, ok helgaði Þór; þar heita nú Hofstaðir. Fjörðrinn var þá bygðr lítt eðr ekki. Þórólfr nam land frá Stafá inn til Þórsár, ok kallaði þat alt Þórsnes; hann hafði svá mikinn átrúnað á fjall þat, er stóð í nesinu, er hann kallaði Helgafell, at þangat skyldi engi maðr óþveginn líta, ok þat var svá mikil friðhelgi, at øngu skyldi granda í fjallinu, hvárki fé né mönnum, nema sjálft gengi á braut; þat var trúa þeira Þórólfs frænda, at þeir dœi allir í fjallit. Þar á nesinu, sem Þórr kom á land, hafði Þórólfr dóma alla ok þar var sett heraðsþing með ráði allra sveitarmanna.
Þeir Þorsteinn þorskabítr ok Þorgeirr kengr börðusk við þá Þorgrím ok Ásgeir þar á þinginu, ok féllu þar nokkurir menn, en margir urðu sárir, áðr þeir urðu skildir. Þórðr gellir sætti þá; ok með því hvárugir vildu láta af sínu máli, þá var völlrinn óheilagr af heiptar blóði. Þá var þat ráð tekit, at fœra brott þaðan þingit, ok inn í nesit, þar sem nú er; var þar þá helgistaðr mikill, ok þar stendr enn Þórs steinn, er þeir brutu þá menn um, er þeir blótuðu; ok þar hjá er sá dómhringr, er menn skyldu til blóts dœma. Þar setti ok Þórðr gellir fjórðungsþing með ráði allra fjórðungsmanna.

átrúnaðr, m. belief (43)			dómhringr, m. count-circle
blótmaðr, m. sacrificer			dœma, to adjudge
blóta, to sacrifice (40, 42)			fiskreki, m. 'fish-driver'
brutu, broke (brjóta)			fjórðungsmenn, m. pl. men of the quarter
dómr, m. law-court			ofríki, n. tyranny

_________

fjórðungsþing, n. assembly for the quarter			líta, to look (9)
friðhelgi, f. sanctuary			óheilagr, unholy
granda, to injure (26)			óþveginn, unwashed
heipt, f. enmity			rekinn, drifted (reka)
helga, to hallow			sárr, wounded
helgistaðr, m. sanctuary			skildr, parted (skilja)
heraðsþing, n. district assembly			skorinn, carved (skera)
hof, n. temple			sveitarmenn, m. pl. men of the district
hvárugr, neither
kengr, m. 'loop'			sætti, reconciled (sætta)
kenna við, to call after			þorskabítr, m. 'cod-biter'
landnám, n. settlement			vágr, m. inlet
láta af, to give way in			völlr, m. plain

<< Previous Page Next Page >>

© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries can be sent to info@northvegr.org. Northvegr™ and the Northvegr symbol are trademarks and service marks of the Northvegr Foundation.