Easy Readings In Old Icelandic
Chapter 37
Haraldr konungr spurði, at víða um mitt landit herjuðu víkingar, þeir er á vetrum váru fyrir vestan haf. Hann hafði þá leiðangr úti hvert sumar ok kannaði eyjar ok útsker; en hvar sem víkingar urðu varir við her hans, þá flýðu allir ok flestir á haf út. En er konungi leiddisk þetta, þá varð þat á einu sumri, at Haraldr konungr sigldi með her sinn vestr um haf; kom hann fyrst við Hjaltland, ok drap þar alla víkinga þá er eigi flýðu undan. Síðan sigldi hann suðr til Orkneyja ok hreinsaði þar alt af víkingum. Eptir þat ferr hann alt í Suðreyjar ok herjar þar; hann drap þar marga víkinga, þá er fyrir liði réðu áðr. Hann átti þar margar orrostur ok hafði jafnan sigr. Þá herjaði hann á Skotland ok átti þar orrostu. En er hann kom vestr í Mön, þá höfðu þeir áðr spurt hvern hernað Haraldr konungr hafði gørt fyrrum þar í landit; þá flýði alt fólk inn á Skotland, ok var þar aleyða af mönnum; braut var ok flutt alt fé þat er mátti; en er þeir Haraldr konungr gengu á land, þá fengu þeir ekki herfang. Í þessum orrostum féll Ívarr, sonr Rögnvalds Mœrajarls. En í bœtr þess gaf Haraldr konungr Rögnvaldi jarli, er hann sigldi vestan, Orkneyjar ok Hjaltland, en Rögnvaldr gaf þegar Sigurði bróður sínum bæði löndin, ok var hann vestr eptir. Þá er konungr sigldi austr, gaf hann Sigurði jarldóm. Þá kom til lags við hann Þorsteinn rauðr sonr Ólafs hvíta ok Auðar hinnar djúpúðgu; þeir herjuðu á Skotland ok eignuðusk Katanes ok Suðrland alt til Ekkjalsbakka. Sigurðr jarl drap Melbrigða tönn, jarl skozkan, ok batt höfuð hans við slagálar sér, ok laust kvikvavöðvanum sínum á tönnina er skagði ór höfðinu; kom þar í blástr, ok fekk hann þar af bana, ok er hann heygðr á Ekkjalsbakka.
| aleyða, quite empty | kanna, to explore | ||
| bani, m. death (14, 17) | kvikva-vöðvi, m. calf of the leg | ||
| batt, bound (binda) | lag, n. fellowship | ||
| blástr, m. swelling | laust, struck (ljósta) | ||
| bœtr, f. pl. compensation (29, 34) | leiddisk, became tired of (leiðask) | ||
| djúpúðigr, deep-minded | leiðangr, n. levy | ||
| eignuðusk, gained (eignask, 35) | mitt, n. middle (miðr) | ||
| flutt, removed (flytja) | skaga, to project | ||
| fyrrum, formerly | skozkr, Scottish | ||
| herfang, n. plunder | slag-ál, f. saddle-strap | ||
| hernaðr, m. warfare | tönn, f. tooth | ||
| heygðr, buried in a mound (haugr) | útsker, n. outlying reef. |
<< Previous Page Next Page >>
© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries can be sent to info@northvegr.org. Northvegr™ and the Northvegr symbol are trademarks and service marks of the Northvegr Foundation.
|